ຂ່າວ

ເຜີຍແຜ່ການນຳໃຊ້ລະບົບໂປຼແກຣມແປພາສາ ລາວ-ອັງກິດ, ອັງກິດ-ລາວ ເທິງມືຖື ເປັນສຽງເວົ້າ ເທື່ອທໍາອິດ ຂອງປະເທດ

ເຜີຍແຜ່ການນຳໃຊ້ລະບົບໂປຼແກຣມແປພາສາ ລາວ-ອັງກິດ, ອັງກິດ-ລາວ ເທິງມືຖື ເປັນສຽງເວົ້າ ເທື່ອທໍາອິດ ຂອງປະເທດ

ກອງປະຊຸມສຳມະນາເຜີຍແຜ່ການນຳໃຊ້ລະບົບໂປຼແກຣມແປພາສາ ລາວ-ອັງກິດ, ອັງກິດ-ລາວ ເທິງມືຖື ແລະ ລະບົບຖານຂໍ້ມູນດິຈິຕ໋ອນ ເພື່ອສົ່ງເສີມການພັດທະນາເສດຖະກິດ-ສັງຄົມ ໄດ້ຈັດຂຶ້ນໃນວັນທີ 18 ພະຈິກ 2020, ທີ່ຫ້ອງປະຊຸມຊັ້ນ 4 ຂອງ ກະຊວງວິທະຍາສາດ ແລະ ເຕັກໂນໂລຊີ (ກວຕ), ຈັດໂດຍ ສະຖາບັນເຕັກໂນໂລຊີຄອມພິວເຕີ ແລະ ເອເລັກໂຕຣນິກ, ກວຕ ໂດຍພາຍໃຕ້ການເປັນປະທານຂອງ ທ່ານ ວິລະສັກ ອິນທະປະຖາ, ຫົວໜ້າສະຖາບັນເຕັກໂນໂລຊີຄອມພິວເຕີ ແລະ ເອເລັກໂຕຼນິກ, ມີຜູ້ຕາງໜ້າຈາກຫ້ອງການ, ກົມ, ສະຖາບັນພາຍໃນ ກວຕ ແລະ ບັນດາຫົວໜ້າ ພະແນກວິທະຍາສາດ ແລະ ເຕັກໂນໂລຊີ ແຂວງ, ນະຄອນຫຼວງວຽງຈັນ ພ້ອມດ້ວຍແຂກທີ່ຖືກເຊີນ ແລະ ນັກສຶກສາຈາກມະຫາວິທະຍາໄລແຫ່ງຊາດ, ນັກຮຽນຈາກໂຮງຮຽນມັດທະຍົມສົມບູນອ້ອມຂ້າງນະຄອນຫຼວງວຽງຈັນເຂົ້າຮ່ວມທັງໝົດ 50 ກວ່າທ່ານ.

ຈຸດປະສົງຂອງກອງປະຊຸມຄັ້ງນີ້, ແມ່ນເພື່ອພັດທະນາ ແລະ ສ້າງລະບົບໂປຼແກຼມແອັບພລີເຄເຊິນ ແປປະໂຫຍກພາສາອັງກິດ-ລາວ ແລະ ແປປະໂຫຍກພາສາລາວ-ອັງກິດດ້ວຍສຽງ ເພື່ອເປັນເຄື່ອງມືໃຫ້ນັກຮຽນ, ນັກສຶກສາ, ນັກທ່ອງທ່ຽວ, ປະຊາຊົນສາມາດນໍາເອົາແອັບດັ່ງກ່າວໄປນໍາໃຊ້ເຂົ້າໃນຊີວິດປະຈໍາວັນໃນການຄົ້ນຄວ້າຊອກຮູ້ຮໍ່າຮຽນ, ການທ່ອງທ່ຽວ ແລະ ອື່ນໆ. ສຳລັບການສ້າງລະບົບໂປຼແກຼມ ແປພາສາລາວ – ອັງກິດ – ລາວ ໄດ້ມີການຮຽບຮຽງການແປປະໂຫຍກທີ່ສໍາເລັດແລ້ວໃນປັດຈຸບັນນີ້ຫຼາຍກວ່າ 40,000 ປະໂຫຍກ ຊຶ່ງປະກອບມີ 33 ໝວດໝູ່ ຄື: ສະຖານທີ່, ສະໜາມບິນ, ເຮືອບິນ, ແທັກຊີ, ອິນເຕີເນັດ ແລະ ການຕິດຕໍ່ສື່ສານ, ທີ່ພັກອາໄສ, ເຮືອ, ລົດເມ, ລົດເກັງ, ການຄົມມະນາຄົມ-ຂົນສົ່ງ, ການເງິນ ແລະ ທະນາຄານ, ການຕ້ອນຮັບ ແລະ ສົ່ງລາ, ສໍາລັບຜູ້ພິການ, ເດີນທາງຮ່ວມກັບເດັກນ້ອຍ, ການເດີນທາງເພື່ອດໍາເນີນທຸລະກິດ, ສຸຂະພາບ, ຕໍາຫຼວດ, ເຫດສຸກເສີນ, ຄວາມຮັກ, ເຫດຮ້າຍ, ດິນຟ້າອາກາດ, ວຽກງານ ແລະ ການຮຽນ, ທ່ອງທ່ຽວ, ຫາໝູ່ໃໝ່, ຄວາມຂັດຂ້ອງໃນການສື່ສານ, ການໂອ້ລົມ, ວັດທະນະທໍາ ແລະ ແສງສີ, ກິລາ ແລະ ການຫຼິ້ນ, ການເລາະຊື້ເຄື່ອງ, ການທ່ຽວຊົມວິວ, ຄາບອາຫານ, ເຄື່ອງດື່ມ ແລະ ການກິນເຂົ້າ.

ການນໍາໃຊ້ໂປຼແກຼມແອັບພລີເຄຊັນ ແປພາສາລາວ – ອັງກິດ – ລາວ ດ້ວຍສຽງເວົ້າເທິງລະບົບໂທລະສັບມືຖື ຖືວ່າເປັນຜົນສໍາເລັດອີກບາດກ້າວໜຶ່ງທີ່ຕອບສະໜອງໃຫ້ກັບວຽກງານວິທະຍາສາດ ແລະ ເຕັກໂນໂລຊີ ຂອງ ສປປ ລາວ ໃຫ້ມີຄວາມທັນສະໄຫມ, ສະດວກ ແລະ ວ່ອງໄວ ໃນການສະໜອງຂໍ້ມູນໃໝ່ໆ ທີ່ທັນກັບສະພາບ ແລະ ເຫດການເກີດຂຶ້ນໃນແຕ່ລະໄລຍະຂອງວຽກງານການຄົ້ນຄວ້າ. ພ້ອມກັນນັ້ນ, ຍັງສາມາດສ້າງເປັນຖານຂໍ້ມູນປະໂຫຍກທີ່ສາມາດເກັບຮັກສາໄດ້ງ່າຍໝັ້ນຄົງ, ຍາວນານ ເພື່ອໃຫ້ກາຍເປັນການພັດທະນາ IT ແບບຍືນຍົງ ແລະ ເປັນສູນລວມປະໂຫຍກທີ່ມີບົດຄວາມອຸດົມສົມບູນຂຶ້ນໄປເລື້ອຍໆ.

ພ້ອມດ້ວຍກັນນັ້ນ, ຍັງໄດ້ຮັບຟັງການນຳສະເໜີກ່ຽວກັບ “ໂຄງການສ້າງຖານຄວາມຮູ້ໃນຮູບແບບ ດິຈິຕ໋ອນ (Digital) ເພື່ອສົ່ງເສີມການຜະລິດ” ເປັນການຄົ້ນຄວ້າສັງລວມ, ເລືອກເຟັ້ນເອົາຄວາມຮູ້ທາງດ້ານຕ່າງໆ ທີ່ມີສໍາຄັນ ແລະ ເປັນປະໂຫຍດໃນການດໍາລົງຊິວິດປະຈໍາວັນ ຊຶ່ງກວມເອົາ 4 ຂົງເຂດໃຫຍ່ ຄື: ດ້ານເຕັກນິກກະສິກໍາ, ວິທະຍາສາດການສຶກສາ, ວິທະຍາສາດຂັ້ນພື້ນຖານ ແລະ ສາທາລະນະສຸກ ໃນຮູບແບບວິດີໂອ ແລະ ເອກະສານແບບເອເລັກໂຕຼນິກ ແລ້ວເຜີຍແຜ່ໃນເວັບໄຊທ໌ຜ່ານເຄືອຂ່າຍອິນເຕີເນັດ ແລະ ແບບເປັນຕູ້ຖານຂໍ້ມູນດິຈິຕ໋ອນ (ສໍາລັບພື້ນທີ່ບໍ່ມີອິນເຕີເນັດ ແລະ ຫ່າງໄກສອກຫຼີກ) ເພື່ອເປັນແຫຼ່ງຮຽນຮູ້, ເຜີຍແຜ່ ແລະ ຖ່າຍທອດຄວາມຮູ້ຈາກສູນກາງ ລົງສູ່ທ້ອງຖິ່ນໃຫ້ມີຄວາມວ່ອງໄວ ແລະ ທົ່ວເຖິງ, ການຫຼຸດໂຕນຄວາມແຕກຕ່າງດ້ານເຕັກນິກວິຊາການ, ການສຶກສາ ແລະ ດ້ານອື່ນໆ ລະຫວ່າງສູນກາງ ແລະ ທ້ອງຖິ່ນໃຫ້ຫຼຸດໜ້ອຍລົງ; ນັກຮຽນ-ນັກສຶກສາ, ຊາວກະສິກອນ ແລະ ປະຊາຊົນທົ່ວໄປສາມາດເຂົ້າເຖິງຂໍ້ມູນໄດ້ຢ່າງ ວ່ອງໄວທັນຕາມຍຸກສະໄໝ ແລະ ນໍາໃຊ້ຄວາມຮູ້ດັ່ງກ່າວໄປໝູນໃຊ້ເຂົ້າໃນການດໍາລົງຊີວິດປະຈໍາວັນ ເພື່ອພັດທະນາຊີວິດການເປັນຢູ່ໃຫ້ດີຂຶ່ນ ທັງເປັນການປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ຂອງ ປະເທດຊາດ.

ໃນກອງປະຊຸມສໍາມະນາຄັ້ງນີ້, ຜູ້ເຂົ້າຮ່ວມຍັງໄດ້ມີການແລກປ່ຽນຄຳຄິດຄຳເຫັນເຊິ່ງກັນ ແລະ ກັນຢ່າງກົງໄປກົງມາ ຊຶ່ງກອງປະຊຸມໄດ້ດຳເນີນໄປເປັນເວລາເຄິ່ງວັນຈຶ່ງໄດ້ປິດລົງດ້ວຍຜົນສໍາເລັດຢ່າງຈົບງາມ.

ຂ່າວ ແລະ ຮູບພາບ: ແສງທອງ ວັນນະທຳ.