ຂ່າວ

ລ້ານຊ້າງ ມີເນໂຣນສ໌ ລິມິເຕັດ ບໍ່ຄໍາ-ທອງເຊໂປນ ໄດ້ຮັບລາງວັນທຸລະກິດອາຊຽນດີເດັ່ນ

ລ້ານຊ້າງ ມີເນໂຣນສ໌ ລິມິເຕັດ ບໍ່ຄໍາ-ທອງເຊໂປນ ໄດ້ຮັບລາງວັນທຸລະກິດອາຊຽນດີເດັ່ນ ໃນການສະກັດກັ້ນກັບການລະບາດຂອງພະຍາດໂຄວິດ-19. ສະໜັບສະໜູນງົບປະມານ ໃຫ້ລັດ 170.000 ໂດລາສະຫະລັດ ໃນການສະກັດກັ້ນພະຍາດ.​

ບໍລິສັດ ຊືເຟິງ ລ້ານຊ້າງ ມີເນໂຣນສ໌ ລິມິເຕັດ ( LXML ) ບໍ່ຄໍາ-ທອງເຊໂປນ ໄດ້ຮັບລາງວັນທຸລະກິດອາຊຽນດີເດັ່ນ ສໍາລັບຜົນງານໃນການສະກັດກັ້ນກັບການລະບາດຂອງພະຍາດໂຄວິດ-19 ເຊິ່ງພິທີປະກາດ ແລະ ມອບຮັບລາງວັນດັ່ງກ່າວແມ່ນໄດ້ຈັດຂຶ້ນໃນວັນທີ 13 ພະຈິກ 2020 ຜ່ານມາ ທີ່ກອງປະຊຸມສຸດຍອດທຸລະກິດ ແລະ ການລົງທຶນອາຊຽນ 2020 ( ASEAN Business and Investment Summit – ABIS 2020 ) ທີ່ນະຫຼວງຮ່າໂນ້ຍ ສສ ຫວຽດນາມ; ລາງວັນດັ່ງກ່າວແມ່ນລາງວັນທຸລະກິດດີເດັ່ນໃນພາກພື້ນ ທີ່ໄດ້ປະກອບສ່ວນຕໍ່ກັບການປ້ອງກັນພະຍາດ ໂຄວິດ – 19 ຂອງ ບໍລິສັດ ຊືເຟິງລ້ານຊ້າງ ມີເນໂຣນສ໌ ລິມິເຕັດ ໂດຍໄດ້ຖືກຄັດເລືອກຈາກຫຼາຍຮ້ອຍຫົວໜ່ວຍທຸລະກິດ ແລະ ນັກລົງທຶນໃນພາກພື້ນ.

ທ່ານ ພໍ ແຮຣິສ ຜູ້ຈັດການໃຫຍ່ LXML ໄດ້ກ່າວວ່າ : ລາງວັນອັນຊົງກຽດນີ້ ແມ່ນໝາກຜົນຄວາມມຸ້ງໝັ້ນ ແລະ ຄວາມເອົາໃຈໃສ່ສູງສຸດຂອງລັດຖະບານລາວ ແລະ ບັນດາພະນັກງານຂອງບໍລິສັດ LXML ໃນການຄວບຄຸມ ແລະ ປ້ອງກັນການແຜ່ລະບາດຂອງພະຍາດໂຄວິດ-19 ທີ່ພວກເຮົາໄດ້ຮັບມືກັບການລະບາດຂອງພະຍາດດັ່ງກ່າວໃນຄັ້ງນີ້ ຄືດັ່ງກັບການຮັບມືກັບວິກິດການໃດໜຶ່ງ ກ່ອນທີ່ມັນຈະເກີດຂຶ້ນຕົວຈິງ.

ຜ່ານການຈັດຕັ້ງປະຕິບັດມາດຕະການປ້ອງກັນ ແລະ ຄວບຄຸມຢ່າງຕັ້ງໜ້າ ການລະບາດຂອງພະຍາດໂຄວິດ-19 ໃນຜ່ານມາ ພວກເຮົາຈຶ່ງສາມາດຮັກສາພະນັກງານພວກເຮົາຫຼາຍກວ່າ 3.500 ຄົນ ແລະ ສະມາຊິກຊຸມຊົນ 40.000 ຄົນ ໃຫ້ປອດໄພ ແລະ ປາສະຈາກການຕິດເຊື້ອຂອງພະຍາດ​ໂຄວິດ​– 19 ແລະ ຈະສືບຕໍ່ປ້ອງກັນຈົນກວ່າການລະບາດຂອງພະຍາດຈະສິ້ນສຸດລົງ. LXML ໄດ້ເລີ່ມແຜນງານປ້ອງກັນຕ່າງໆ ມາຕັ້ງແຕ່ເດືອນ ມັງກອນ ປີ 2020 ( ກ່ອນພະຍາດໂຄວິດ​– 19 ໄດ້ເຂົ້າມາລະບາດໃນ ສປປ ລາວ ) ເປັນຕົ້ນມາ ໂດຍນໍາໃຊ້ລະບຽບການຄວບຄຸມ, ການສື່ສານ ແລະ ປູກຈິດສໍານຶກກ່ຽວກັບພະຍາດ ແລະ ວິທີປ້ອງກັນ, ການຈໍາກັດ-ເວັ້ນໄລຍະຫ່າງທາງສັງຄົມຕ່າງໆ ແລະ ໄດ້ສຸມໃສ່ສົ່ງເສີມການປ່ຽນແປງດ້ານວັດທະນະທໍາ ແລະ ພຶດຕິກໍາ ເພື່ອທ່ວງທັນສອດຄ່ອງກັບວິທີການດໍາລົງຊີວິດແບບໃໝ່ທີ່ມີການປ່ຽນແປງໄປເລື້ອຍໆ. ຍ້ອນຄວາມພະຍາຍາມ ແລະ ການລິເລີ່ມແຜນງານເຫຼົ່ານີ້ ບໍລິສັດ ຈຶ່ງເປັນ 1 ໃນ 5 ບໍລິສັດ ທີ່ໄດ້ຮັບອະນຸຍາດໃຫ້ສືບຕໍ່ ດໍາເນີນກິດຈະການໃນໄລຍະລ໋ອກດາວໃນ ສປປ ລາວ ແລະ ໄດ້ຮ່ວມມືກັບລັດຖະບານ ແລະ ໄດ້ສະໜັບສະໜູນງົບປະມານສູງສູງເຖິງ 170.000 ໂດລາສະຫະລັດ ໃນການປ້ອງກັນການແຜ່ລະບາດຂອງພະຍາດໂຄວິດ​ – 19 ຢູ່ ສປປ ລາວ.

ຂ່າວ : ບໍລິສັດ LXML