ຂ່າວ

ອຸຕຸເເຈ້ງ !! ສະພາບອາກາດເດືອນພຶດສະພາ ຈະຮ້ອນຫາຮ້ອນເອົ້າ ເຕືອນເຝົ້າລະວັງພາຍຸລະດູຮ້ອນ

ສະພາບອາກາດ ໃນເດືອນ ພຶດສະພາ 2020: ໄລຍະຕົ້ນເດືອນ ພຶດສະພາ 2020, ບໍລິເວນຄວາມກົດດັນຂອງອາກາດຮ້ອນຈະປົກຄຸມ ສົມທົບກັບກະແສລົມຕາເວັນຕົກຕາເວັນຕົກສ່ຽງໃຕ້ພັດປົກຄຸມ ຊຶ່ງຈະເຮັດໃຫ້ອາກາດຮ້ອນຫາຮ້ອນເອົ້າໃນແຕ່ລະພາກ ພ້ອມມີຝົນຕົກຟ້າຮ້ອງຟ້າເຫຼື້ອມໃນລະດັບຄ່ອຍຫາປານກາງຢູ່ບາງທ້ອງຖິ່ນ

ໄລຍະກາງເດືອນ ຄວາມ ກົດດັນອາກາດສູງຈາກປະເທດຈີນ ຈະແຜ່ລົງມາປົກຄຸມເຂດພາກເຫນືອຂອງປະເທດລາວດ້ວຍກໍາລັງອ່ອນ ພ້ອມດຽວກັນ ບໍລິເວນຄວາມກົດດັນອາກາດຕໍ່າທີ່ມີກໍາລັງແຮງຈະປົກຄຸມເຂດທະເລອັນດາມັນ ແລະ ໄດ້ມີກະແສລົມຕາເວັນຕົກສ່ຽງໃຕ້ ພັດປົກຄຸມພາກໃຕ້ ແລະ ພາກກາງຂອງປະເທດລາວ ຊຶ່ງຈະເຮັດໃຫ້ມີຝົນຕົກໃນລະດັບຄ່ອຍໃນແຕ່ລະພາກ ແລະ ຕົກ ປານກາງຢູ່ບາງທ້ອງຖິ່ນ, ຈົນມາຮອດໄລຍະທ້າຍເດືອນພຶດສະພາ 2020, ກະແສລົມມໍລະສຸມຕາເວັນຕົກສ່ຽງໃຕ້ຈະມີ ກໍາລັງແຮງເພີ່ມຂຶ້ນພັດປົກຄຸມ ຊຶ່ງຈະເຮັດໃຫ້ມີຝົນຕົກຫຼາຍເພີ່ມຂຶ້ນໃນແຕ່ລະພາກ ຊຶ່ງຈະເປັນໄລຍະເລີ່ມຕົ້ນລະດູຝົນປະຈໍາປີ 2020.

ສະພາບອາກາດ ໃນເດືອນ ມິຖຸນາ 2020; ໃນໄລຍະຕົ້ນເດືອນ ມິຖຸນາ 2020, ສົມທົບກັບກະແສລົມມໍລະສຸມຕາເວັນຕົກສ່ຽງໃຕ້ພັດປົກຄຸມ ຊຶ່ງຈະເຮັດໃຫ້ມີຝົນຕົກໃນລະດັບຄ່ອຍຫາປານກາງ ໃນແຕ່ລະພາກ, ຈາກນັ້ນໄລຍະ ກາງ ຫາທ້າຍເດືອນ ຮ່ອງຄວາມກົດດັນອາກາດຕໍ່າຈະພາດຜ່ານພາກເຫນືອ ແລະ ພາກກາງຂອງປະເທດລາວ ສົມທົບກັບກະແສ ລົມຕາເວັນຕົກສ່ຽງໃຕ້ພັດປົກຄຸມ ຊຶ່ງຈະເຮັດໃຫ້ມີຝົນຕົກໃນລະດັບຄ່ອຍຫາປານກາງເປັນບໍລິເວນກວ້າງ ແລະ ຕົກຫນັກ ຢູ່ບາງທ້ອງຖິ່ນ.

ສະພາບອາກາດ ໃນເດືອນ ກໍລະກົດ 2020: ໃນໄລຍະຕົ້ນຫາກາງເດືອນ ກໍລະກົດ 2020, ຮ່ອງຄວາມກົດດັນອາກາດຕໍ່າ ຈະສືບຕໍ່ພາດຜ່ານພາກເຫນືອ ແລະ ພາກກາງຂອງປະເທດລາວ ປ່ອງໃສ່ພາຍຸຫມຸນເຂດຮ້ອນ ທີ່ຈະເຄື່ອນທີ່ຜ່ານພາກເຫນືອ ຂອງປະເທດຟິລິບປິນ ແລະ ເຂດທະເລຈີນໃຕ້ຕອນເທິງ ຊຶ່ງຈະເຮັດໃຫ້ມີຝົນຕົກໃນລະດັບຄ່ອຍຢູ່ທົ່ວໄປ ແລະ ຕົກປານ ກາງຫາຫນັກຢູ່ບາງທ້ອງຖິ່ນ, ຈາກນັ້ນ ໄລຍະກາງຫາທ້າຍເດືອນ ກະແສລົມມໍລະສຸມຕາເວັນຕົກສ່ຽງໃຕ້ຈະອ່ອນກໍາລັງລົງ ຊຶ່ງຈະເຮັດໃຫ້ມີຝົນຕົກຫຼຸດລົງໃນແຕ່ລະພາກ ແລະ ມີບາງທ້ອງຖິ່ນອາດຈະມີຝົນຂາດຊ່ວງ.

ຄໍາເຕືອນເພື່ອເຝົ້າລະວັງ: ໃນໄລຍະເດືອນ ພຶດສະພາ 2020 ຍັງຈະມີອາກາດຮ້ອນເອົ້າຫຼາຍຢູ່ຕື່ມອີກ ຊຶ່ງຈະເກີດມີພາຍຸລະດູຮ້ອນ ໃນລັກສະນະຝົນຕົກຟ້າຮ້ອງຟ້າເຫຼື້ອມ, ຟ້າຜ່າ, ຫມາກເຫັບຕົກ ແລະ ລົມພັດແຮງ ຢູ່ຕາມບາງທ້ອງຖິ່ນ ຊຶ່ງຈະເຮັດໃຫ້ມີຕົ້ນໄມ້ໃຫຍ່ ແລະ ເສົາໄຟຟ້າຫັກລົ້ມ, ເຮືອນຕຶກອາຄານ ເປ່ເພ; ໄລຍະເດືອນມິຖຸນາ 2020 ສະພາບຝົນຈະຕົກຕໍ່ເນື່ອງຕິດຕໍ່ກັນຫຼາຍວັນ ຊຶ່ງຈະເຮັດໃຫ້ເກີດມີດິນເຈື່ອນ ແລະ ນ້ໍາຖ້ວມຊູ່ບາງທ້ອງຖິ່ນແຂວງພາກເຫນືອ ແລະ ພາກກາງ; ໄລຍະກາງ ຫາ ທ້າຍເດືອນ ກໍລະກົດ 2020 ສະພາບຝົນຈະຫຼຸດລົງແລະ ມີບາງທ້ອງຖິ່ນຈະມີຝົນຕົກຫນ້ອຍ ຫຼື ມີ ຝົນຂາດຊ່ວງ, ຊຶ່ງຈະເຮັດໃຫ້ເກີດມີການຂາດແຄນນ້ໍາເພື່ອການກະສິກໍາ ໂດຍສະເພາະແມ່ນການຕາດແດນນ້ໍາໃນ ການປັກດໍາເຂົ້ານາປີ.

ດັ່ງນັ້ນ, ຈຶ່ງແຈ້ງເຕືອນເຖິງພໍ່ແມ່ປະຊາຊົນ ແລະ ອົງການປົກຄອງທ້ອງຖິ່ນທຸກພາກສ່ວນຄວນມີສະຕິ ລະມັດລະວັງ ຕໍ່ສະພາບອາກາດຮ້າຍແຮງດັ່ງກ່າວ ທີ່ອາດຈະເກີດຂຶ້ນໄດ້ ໃນໄລຍະເດືອນ ພຶດສະພາ ຫາ ກໍລະກົດ 2020 ນີ້