ຂ່າວ

ແຂວງໄຊຍະບູລີ !! ສືບຕໍ່ຮັບແຮງງານລາວທີ່ຕົກຄ້າງຢູ່ຈັງຫວັດເລີຍກັບຄືນບ້ານເກີດ

ແຂວງໄຊຍະບູລີ !! ສືບຕໍ່ຮັບແຮງງານລາວທີ່ຕົກຄ້າງຢູ່ຈັງຫວັດເລີຍກັບຄືນບ້ານເກີດ

ເນື່ອງຈາກສະຖານະການຂອງເຊື້ອພະຍາດອັກເສບປອດສາຍພັນໃໝ່ ໂຄວິດ-19 ຍັງສືບຕໍ່ແຜ່ລະບາດເປັນວົງກວ້າງ, ຈໍານວນຜູ້ຕິດເຊື້ອ ແລະ ເສຍຊີວິດໃນທົ່ວໂລກນັບມື້ນັບເພີ່ມຂຶ້ນ. ເພື່ອເປັນການສະກັດກັ້ນ ແລະ ແກ້ໄຂບັັນຫາດັ່ງກ່າວ ລັດຖະບານທັງສອງປະເທດ (ສປປ ລາວ ແລະ ຣາຊະອານາຈັກໄທ) ໄດ້ມີມາດຕະການປິດປະເທດຊົ່ວຄາວ ເຊິ່ງໄລຍະນີ້ແມ່ນໄດ້ມີການປິດການເຂົ້າອອກດ່ານສາກົນຊົ່ວຄາວ ຂອງບຸກຄົນ, ຍົກເວັ້ນສະເພາະລົດຂົນສົ່ງສິນຄ້າ

ນັບແຕ່ວັນທີ 3 ເມສາ 2020 ຢ່າງເປັນທາງການ, ຍ້ອນສະພາບບັນຫາດັ່ງກ່າວ ອັນໄດ້ເຮັດໃຫ້ມີແຮງງານລາວທີ່ໄປອອກແຮງງານຢູ່ປະເທດໄທ ເຊິ່ງມີຈຸດປະສົງກັບຄືນບ້ານຂອງຕົນ ບໍ່ສາມາດກັບຄືນໄດ້ຕາມກໍານົດເວລາ ຈຶ່ງຖືກຕົກຄ້າງຢູ່ອໍາເພີທ່າລີ ຈັ່ງຫວັດເລີຍຣາຊະອານາຈັກໄທ ເຊິ່ງຝ່າຍໄທໄດ້ ອໍານວຍຄວາມສະດວກດ້ານສະຖານທີ່, ເຄື່ອງອຸປະໂພກ ແລະ ບໍລິໂພກໃຫ້ແກ່ແຮງງານລາວເປັນຢ່າງດີ ແລະ ໃນຕອນບ່າຍວັນທີ 7 ເມສາ 2020 ນີ້, ຢູ່ທີ່ອາຄານດ່ານສາກົນຂົວມິດຕະພາບນໍ້າເຫືອງ ອໍາເພີທ່າລີ່ ຈັ່ງຫວັດເລີຍ ໄດ້ຈັດພິທີ ມອບຮັບແຮງງານລາວທີ່ຕົກຄ້າງຢູ່ອໍາເພີທ່າລີ ໃຫ້ແຂວງໄຊະຍະບູລີ ເຊິ່ງຕາງໜ້າຝ່າຍແຂວງໄຊຍະບູລີ ນໍາໂດຍທ່ານ ເພັງນິລັນ ຄໍາພັນເພັງຮອງເຈົ້າແຂວງໄຊຍະບູລີ ພ້ອມດ້ວຍຄະນະ ແລະ ຝ່າຍຈັ່ງຫວັດເລີຍ ນໍາໂດຍທ່ານ ໂສພົນ ສຸວັນນະລັດ ຮອງຜູ້ວ່າຣາຊະການຈັ່ງຫວັດເລີຍ ພ້ອມດ້ວຍຄະນະ.

ໃນການມອບຮັບຄັ້ງນີ້, ມີແຮງງານລາວທີ່ຕົກຄ້າງທັງໝົດ 120 ກ່ວາຄົນ, ຍິງ 50 ກ່ວາຄົນ. ໃນນີ້, ແຮງງານເມືອງໄຊຍະບູລີ 5 ຄົນ, ຍິງ 2 ຄົນ, ເມືອງພຽງ 30 ກ່ວາຄົນ, ຍິງ 16 ຄົນ, ເມືອງປາກລາຍ 30 ກ່ວາຄົນ, ຍິງ 13 ຄົນ, ເມືອງແກ່ນທ້າວ 30 ກ່ວາຄົນ, ຍິງ 17 ຄົນ, ເມືອງບໍ່ແຕນ 7 ຄົນ, ຍິງ 5 ຄົນ, ເມືອງທົ່ງມີໄຊ 3 ຄົນ, ຍິງ 1 ຄົນ, ແຂວງວຽງຈັນ 5 ຄົນ, ຍິງ 3 ຄົນ ແລະ ນະຄອນຫຼວງວຽງຈັນ 3 ຄົນ, ຍິງ 2 ຄົນ. ທັງສອງຝ່າຍໄດ້ເຫັນດີເປັນເອກະພາບກັນພາຍຫຼັງທີ່ໄດ້ມີການມອບຮັບ ແຮງງານລາວທີ່ຕົກຄ້າງໃນຄັ້ງນີ້ແລ້ວ ໃຫ້ປິດ ແລະ ຍຸຕິ ສູນຄວບຄຸມກັກກັນ ໃນພື້ນທີ່ອໍາເພີທ່າລີ ຈັ່ງຫວັັດເລີຍ ແຫ່ງຣາຊະອານາຈັກໄທ ແລະ ຫ້າມບໍ່ໃຫ້ມີການເຄື່ອນຍ້າຍແຮງງານລາວເຂົ້າຈັ່ງຫວັດເລີຍ ຈົນກວ່າສະພາບຈະເປັນປົກກະຕິ ແລະ ໃຫ້ປະຕິບັດຕາມຫຼັກການຢູ່ບ່ອນໃດແມ່ນກັກບໍລິເວນຢູ່ບ່ອນນັ້ນ, ສືບຕໍ່ຮ່ວມມືທາງດ້ານຂໍ້ມູນຂ່າວສານ ດ້ານວິຊາການແພດ ເພື່ອຄວບຄຸມ ໂຄວິດ-19 ຮ່ວມກັນ.

ທາງຝ່າຍຈັ່ງຫວັດເລີຍ ຈະສືບຕໍ່ຮ່ວມມືກັບຝ່າຍແຂວງໄຊຍະບູລີ ໃນການສະໜັບສະໜູນ ແລະ ຊ່ວຍເຫຼືອເຊິ່ງກັນແລະ ກັນ, ກໍລະນີທີ່ປະຊາຊົນຂອງທັງສອງຝ່າຍມີຄວາມຈໍາເປັນທີ່ຈະເດີນທາງຜ່ານແດນ ແມ່ນຈະຕ້ອງມີໜັງສືຢັ້ງຢືນຈາກກົງສູນ, ສະຖານທູດ ຂອງແຕ່ລະຝ່າຍ ແລະ ມີໜັງສືຢັ້ງຢືນການແພດຕາມລະບຽບການກ່ອນ ແລ້ວຈຶ່ງອະນຸຍາດຂ້າມດ່ານໄດ້.

ທີ່ມາແຫລ່ງຂ່າວ: ໄຊຍະບູລີ