ຂ່າວ

ລະດັບຂອງ ນ້ຳຂອງ ບົກແຫ້ງສົ່ງຜົນກະທົບໃຫ້ແກ່ການຜະລິດຊາວກະສິກອນ

ລະດັບຂອງ ນ້ຳຂອງ ບົກແຫ້ງສົ່ງຜົນກະທົບໃຫ້ແກ່ການຜະລິດຊາວກະສິກອນ

ລະ­ດັບນ້ຳ­ຂອງໃນປັດ­ຈຸ­ບັນ ໄດ້ມີການບົກແຫ້ງເປັນຫາດ ແລະ ເປັນດອນ ໂດຍສະ­ເພາະເຂດບ້ານປ່າຫວ້າເມືອງຫາດຊາຍຟອງ ນະຄອນຫລວງວຽງຈັນ ແມ່ນແນມຈາກຝັ່ງ ລົງໄປຫານ້ຳ­ຂອງມີໄລ­ຍະປະ­ມານ 30 ແມັດ ເຊິ່ງເປັນເຫດ­ການໜຶ່ງທີ່ບໍ່ເຄີຍມີມາກ່ອນ.

ທ່ານ ສະ­ຫງວນ ເທ­ພາພິນ ນາຍ­ບ້ານປ່າຫວ້າໃຫ້ສຳ­ພາດວັນທີ 6 ມັງ­ກອນ 2020 ວ່າ:ບ້ານປ່າຫວ້າເປັນບ້ານໜຶ່ງທີ່ຕັ້ງລຽບຕາມແມ່­ນ້ຳຂອງມີຄວາມຍາວ 1.200 ແມັດ ທິດ­ເໜືອຕິດກັບດົງມານ ທິດ­ໃຕ້ຕິດກັບແມ່­ນ້ຳຂອງ ແລະ ທິດ­ຕາ­ເວັນ­ອອກຕິດກັບບ້ານທ່າເດື່ອ ແລະ ທິດ­ຕາ­ເວັນ­ຕົກຕິດກັບບ້ານທ່າມ່ວງ ມີປະ­ຊາ­ກອນທັງໝົດ 947 ຄົນ ຍິງ 503 ຄົນ ມີ 204 ຫຼັງ­ຄາ 197 ຄອບ­ຄົວ 17 ໜ່ວຍ ເຊິ່ງການດຳ­ລົງຊີ­ວິດຂອງປະ­ຊາ­ຊົນແຕ່ກ່ອນແມ່ນເຮັດນາ ແລະ ປູກພືດຜັກຕ່າງໆ ແຕ່ການດຳ­ລົງຊີ­ວິດແບບດັ່ງ­ກ່າວບໍ່ມີຄວາມຄືບໜ້າດັ່ງ­ນັ້ນປັດ­ຈຸ­ບັນປະ­ຊາ­ຊົນຈຶ່ງໄດ້ຫັນມາເຮັດອາ­ຊີບຄ້າ­ຂາຍ.

ສຳ­ລັບການລົງຊີ­ວິດຂອງປະ­ຊາ­ຊົນຢູ່ລຽບແມ່­ນ້ຳຂອງສ່ວນຫຼາຍແມ່ນ ຊິດ­ເບັດ ໄຫຼມອງ ແລະ ສູບ ນ້ຳ­ຂອງສະ­ໜອງໃຫ້ແກ່ການຜະ­ລິດດ້ວຍຕົ້ນທຶນທີ່ຕ່ຳ ມາຮອດປັດ­ຈຸ­ບັນອີງ­ໃສ່ເງື່ອນ­ໄຂສະ­ພາບຄວາມເປັນຈິງປີ2019 ແລະ ປີ 2020 ລະ­ດູ­ແລ້ງເຫັນວ່ານ້ຳ­ຂອງໄດ້ບົກແຫ້ງຈາກຝັ່ງລົງໄປປະ­ມານ 30 ແມັດ ຖ້າທຽບ­ໃສ່ໄລ­ຍະກ່ອນແມ່ນຍັງເຫຼືອ 2-3 ແມັດເທົ່ານັ້ນ ໄດ້ເຮັດໃຫ້­ການສະ­ໜອງນ້ຳໃຫ້ແກ່ການຜະ­ລິດພົບຄວາມຫຍຸ້ງ­ຍາກ ແລະ ອີງ­ໃສ່ທີ່ຕັ້ງຂອງບ້ານປ່າຫວ້າບັນ­ດາຂະ­ແໜງ­ການກ່ຽວ­ຂ້ອງ ໄດ້ສູບນ້ຳໄຫຼຜ່ານຄອງຊົນ­ລະ­ປະ­ທານບ້ານປ່າຫວ້າໄປທາງທ່າເດື່ອ ແລະ ສົ່ງໄປຮອດຖິ່ນຕົມ ເພື່ອສະ­ໜອງນ້ຳໃຫ້ແກ່ການຜະ­ລິດພືດລະ­ດູ­ແລ້ງໃຫ້ພຽງ­ພໍ ນອກນີ້ຈາກສະ­ພາບນ້ຳ­ຂອງບົກແຫ້ງຍັງໄດ້ເຮັດໃຫ້ຊາວປະ­ມົງ ຫຼື ຜູ້ເຮັດທຸ­ລະກິດເທິງໜ້າ­ນ້ຳພົບຄວາມຫຍຸ້ງ­ຍາກເຊັ່ນ: ເຮືອໂດຍ­ສານ ແລະ ຈັກ­ສູບ­ນ້ຳໄດ້ມີການເຄື່ອນຍ້າຍສະ­ຖານ­ທີ່ຕະ­ຫຼອດ.

Cr : ໜັງສືພິມ ວຽງຈັນໃຫ່ມ